في ركن بعيد هادي من أركان فندق «فيرمونت هيليوبوليس - Fairmont Heliopolis» هـ تلاقي مطعم «ماريا – Maria's»؛ مطعم مكسيكي جميل.

أول ما الميتر يشاورلك على مكان الجلوس في المطعم اللي حجمه متوسط، هـ تنبهر بالوان المكان الساطعة اللي معظمها أحمر وبرتقالي، لدرجة اننا تخيلنا أنهم غموا عنينا وخطفونا للمكسيك فعلاً، كل شبر في المكان مكسيكي حتى النخاع.

بعيداً عن الديكور لأنه آخر حاجة الواحد بـ يبصلها وهو بـ يجرب مطعم مكسيكي جديد، احنا كنا متحمسين جداً اننا جرب المطعم المكسيكي اللي قدمه لنا فندق «فيرمونت». البداية الرائعة لأي مطعم مكسيكي هي تحية المكان المجانية من رقايق الذرة المقرمشة وصلصة قطع الطماطم والفلفل المتبلة بالنعناع عشان تغطس فيها المقرمشات وتفتح نفسك.

للمشهيات طلبنا طبق من الجواكمولي (معجون الأﭭـوكادو بالليمون والتوابل والكسبرة) ومعاه سلاطة وسعره كان 55 جنيه، الخلطة بـ تتعمل قدام عينيك وانت قاعد عشان تعرف قد ايه هي فريش ومخصوصة لدرجة انك ممكن تحدد عايز بصل وثوم وشطة قد إيه، في النهاية هـ يكون قدامك طبق هايل هـ تاكل لغاية آخر فتفوتة فيه، ولما رقايق الذرة اللي بـ تغمس بيها تخلص، هاتكله بـ صوابعك.

سلاطة الـ«دي نارنيا بيتابيل» وسعرها 50 جنيه كانت نموذج للمذاق المكسيكي، خليط من الخضروات الفريش والطماطم والجبنة والبنجر المخبوز ومكعبات البرتقال الجيلاتينية المخلوطة باللوز بالكراميل، النتيجة كانت خرافية ومنعشة جداً.

فراخ «مارياز انشلادس» كانت إختيارنا للوجبة الرئيسية، نفس المذاق المكسيكي الأصلي بدون شك، 4 قطع خبز التورتيا محشية بالفراخ المفرومة والأرز ومتغطية بصوص الكريمة المززة وصوص «المول بوبلانو - mole poblano» اللي عبارة عن خليط من الشيكولاتة والقرفة (90 جنيه) والحقيقة أن مفهومنا عن الأكلات الحلوة - المززة (Sweet & Sour) اتغير بعد الأكلة دي، وعرفنا أن فيه أفكار عبقرية كتير ممكن تتعمل بالطريقة دي، ومسحنا الأطباق بما فيها من صوصات برضه لآخر نقطة.

فاهيتا الفراخ (95 جنيه) بتـ تقدم سخنة مع شوية خضار مِستوي على الجريل مع التورتيا الشهيرة والكريمة المززة وصوص الجواكمولي والطماطم. مش دهنية قوي وهـ تحس أنها خفيفة وصحية وفريش، من أحسن – أن ماكنتش الأحسن - فاهيتا ممكن تاكلها في القاهرة.

لو لسة فيه مكان في معدتك للحلويات فيه عندهم الـ«شيميشانجا - chimichanga» العملاقة، وده نوع من المخبوزات المكسيكية بعجين التورتيا اللي اسمها «بوريتو»، بتـ تقلي في الزيت وبـ تكون محشية بحلويات ومسكرات بأنواع كتير. لما بـ تطلب الشيك بـ يجيلك معاه بونبون وفنضام وده أكيد ماكانش ليه مكان بعد الأكل ده كله.

جايز ده مش أجمل مكان في الشكل في القاهرة، بس مطبخه فعلاً فريد وخطير، بجد مش قادرين نوصف قد إيه الجواكمولي كان لذيذ.