دائمًا الأكل اللبناني أو السوري بـ يكون من الاختيارات المطروحة لو كنت مع مجموعة كبيرة من الناس وكل واحد فكر في أكلة غير الثاني، وبما أن الاتفاق على أكلة ترضي جميع الأطراف حاجة صعبة وخاصة لما تبقى في مكان زي فوود كورت Food Court سيتي ستارز المغري جدًا بالتنوع الكبير في المطاعم الموجودة.

«جبل لبنان» هو المطعم اللبناني الوحيد في ساحة الطعام في الدور الأول في سيتي ستارز في المرحلة الأولى، المحل موجود جنب «هارديز»، وله يافطة كبيرة باللون الأصفر عليها لوجو المحل المميز بجبلين وشجرة الأرز الخضراء. المحل طبعًا زي كل محلات الفوود كورت عبارة عن كاونتر عليه الكاشير والمنيو على الحائط الخلفي، بس هنا كمان كان فيه منيو مطبوع على غير عادة مطاعم المنطقة دي.

المنيو ضخم جدًا، وممكن تأخذ وقت علشان تعرف تختار من أنواع الأطباق الموجودة. فيه مشاوي لبنانية وأطباق جبل لبنان الخاصة ومن ضمنها البيكاتا بالمشروم، والكبدة الإسكندراني (اللي المفروض مالهاش دعوة بلبنان خالص) وطبق الفلافل بالحمص والفتوش. فيه كمان ركن المأكولات البحرية بس ماحبيناش نجرب منه حاجة لأن مش ده الهدف من زيارة المطعم، وركن خاص بالفطائر الحلوة والحادقة والبيتزا الإيطالية والمناقيش، وفيه ركن اسمه «توربينو جبل لبنان» ودي أكلة خاصة بالمحل بس ماكانش فيه مكان في معدتنا علشان نجربه، يمكن نعمل ده في الزيارة الجاية. وركن للسندوتشات بالعيش اللبناني وعيش الصاج، وطبعًا المزات اللبنانية الشهيرة موجودة بوفرة، البارد منها والساخن، والسلاطات بأنواع كثيرة وأخيرًا الحلويات زي الزلابية وبلح الشام وأم علي، والمشروبات كلها غازية.

جربنا طبق المشاوي اللبناني الشهير (ميكس جريل) وكان فيه طبعًا كباب وكفتة وفراخ مشوية مع أرز أصفر كان سعره 45 جنيه، بس اللافت للانتباه أن الكمية كانت قليلة جدًا وتأكدنا أول ما شفناه أنه مش ممكن يشبع شخص واحد، وأكيد هـ نطلب أكل ثاني، بس الطعم كان حلو والشواء نفسه كان هائل واللحمة والفراخ كانت طازجة وتتبيلتها خطيرة، طلبنا كمان فتة شاورما اللحمة والفراخ (29 جنيه) ودي كميتها كانت معقولة ومشبعة فعلاً، بس المشكلة أن كان فيه قطع دهن (ليّة) كثيرة وكبيرة وسط الشاورما، بس في النهاية الطعم كان جيد والشاورما كانت لذيذة وعليها ملعقة ثومية كبيرة من فوق.

وفي المشهيات طلبنا طبق مشكل من السلاطات والمزات اللبناني (19 جنيه) اختارنا فيه 4 أنواع سلاطة هي اللبنة والفتوش والكول سلو والثومية وكلها كانت على المستوى المطلوب واستمتعنا فعلاً بغمس قطع المشاوي في كل الصوص ده، وما سيبناش فتفوتة فتوش من كثر ما هو خطير.

الخدمة جيدة بس بطيئة شوية، بـ يأخذوا وقت على ما يحضروا الطبق خصوصًا لو فطائر أو مشاوي، وطبعًا أي حد عارف فوود كورت سيتي ستارز هـ يبقى عارف أنه بـ يكون زحمة جدًا في أوقات معينة منها الأجازات والويك إند بالليل. المطعم بشكل عام جيد وأكله حلو، بس لو ركز أكثر في الأصناف اللبناني الصريحة هـ يكون أحسن والخدمة بشكل عام هـ تبقى أحسن وأسرع، وهـ تسهل على الزبائن وهم بـ يختاروا من المنيو الكبير جدًا، وبـ تقلل احتمالات أنك تختار حاجة وتطلع مش حلوة.

المحل له فرع في القاهرة في سيتي ستارز في مصر الجديدة، وفرع ثاني في «سينزو مول» في الغردقة، بس كده! واحنا متوقعين فروع ثانية تفتح قريب في القاهرة.